«Պատերազմի դեմքերը» խորագրով երաժշտական-պոետիկ հուշ-երեկո՝ նվիրված 44-օրյա պատերազմի հերոսներին

26 սեպտեմբերի, 2021

Մինսկի քաղաքային մշակութա-լուսավորչական «Հայաստան» միության շենքում 2021թ․ սեպտեմբերի 26-ին կայացավ համայնքի երիտասարդների կողմից կազմակերպված «Պատերազմի դեմքերը» խորագրով երաժշտական-պոետիկ հուշ-երեկո՝ նվիրված Արցախի և նրա խաղաղ ազգաբնակչության դեմ Թուրքիայի օժանդակությանմբ Ադրբեջանի կողմից սանձազերծված 44-օրյա պատերազմի հերոսներին։

Միջոցառման ներկաներին խոսքով դիմեց Բելառուսում ՀՀ նորանշանակ արտակարգ և լիազոր դեսպան Ռ․Խումարյանը, ով մասնավորապես ընդգծեց, որ մենք անկասկած կունենանք նորանոր հաղթանակներ, և յուրաքանչյուրս, ամեն մեկն իր տեղում, պետք է անի առավելագույնը նաև ընկած մեր եղբայրների փոխարեն՝ այդ հաղթանակները մոտեցնելու համար:

Այնուհետև միջոցառման ներկաներից մի քանիսը կիսվեցին պատմություններով պատերազմում զոհված իրենց ազգականների, ընկերների մասին, և ցուցադրվեցին համապատասխան ռեպորտաժներ, տեսանյութեր, ու լուսանկարներ։

Միջոցառման շրջանակներում տեղի ունեցավ արվեստաբանության մագիստրոս Հռիփսիմե Գևորգյանի գրաֆիկական աշխատանքների շարքի ցուցահանդեսի բացումը։ Միաժամանակ ցուցադրվեցին Բելառուսի ազգային տեխնիկական համալսարանի ճարտարապետական ֆակուլտետի ուսանող Վազգեն Թադևոսյանի աշխատանքներից մի քանիսը։ Հայազգի տաղանդաշատ երիտասարդները հանդես եկան երաժշտական կատարումներով, այդ թվում՝ Սերժ Թանկյանի «Արցախ» հեղինակային երգի կատարմամբ, ասմունքեցին։ Միջոցառման վերջում իրականացվեց յուրատեսակ պարային ֆլեշմոբ՝ յարխուշտայի և հայկական այլ ռազմական պարերի կատարմամբ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր