«Բրեստ 2022» համաժողովին Բելառուսում ՀՀ դեսպան Ռ.Խումարյանի մասնակցության վերաբերյալ

22 մայիսի, 2022

2022թ․ մայիսի 18-19-ը Բելառուսում ՀՀ դեսպան Ռազմիկ Խումարյանը Բրեստ քաղաքում մասնակցեց գործարար կապերի «Բրեստ 2022» միջազգային համաժողովին, որի շրջանակներում քննարկվեցին օտարերկրյա բիզնես գործընկերների հետ Բրեստի մարզի առևտրատնտեսական հարաբերությունների զարգացմանն առնչվող հարցեր։ Համաժողովի հանդիսավոր բացման նիստին ներկա գտնվեցին, ինչպես նաև տեսակապի միջոցով մասնակցություն ունեցան Բրեստի մարզային ու քաղաքային իշխանությունների ղեկավարներ, Ռուսաստանի դաշնային մի քանի սուբյեկտների (Բրյանսկի և Պենզայի մարզեր, Բուրյաթիայի Հանրապետություն) պատվիրակություններ, ՇՀԿ և ԵԱՏՄ պաշտոնյաներ, Ասիա-խաղաղօվկիանոսյան տարածաշրջանի մի քանի պետությունների (Չինաստան, Վիետնամ, Ինդոնեզիա) նահանգապետեր ու քաղաքապետեր, Բելառուսում հավատարմագրված օտարերկրյա պետությունների դեսպաններ։

ՀՀ դեսպանն իր ելույթում խոսեց ՀՀ առկա տնտեսական ներուժի, տնտեսական գործունեության համար նպաստավոր պայմանների, դինամիկ զարգացող տեղեկատվական ու հեռահաղորդակցային ոլորտի, Հայաստանի տուրիստական գրավչության մասին։

Մայիսի 19-ին դեսպան Խումարյանը հանդիպում ունեցավ Բրեստի մարզային գործադիր կոմիտեի նախագահ (նահանգապետ) Յուրի Շուլեյկոյի հետ։ Զրուցակիցներն անդրադարձան առևտրատնտեսական ոլորտում հայ-բելառուսական երկկողմ հարաբերությունների ընթացիկ դինամիկային, ինչպես նաև Բրեստի մարզի և ՀՀ Արարատի մարզի միջև նախկինում կնքված համաձայնագրի շրջանակներում համագործակցության խթանմանը վերաբերող հարցերին։

Հանդիպման ավարտին դեսպան Խումարյանը Յ․Շուլեյկոյին նվիրեց «Հայ մարտիկները Բելառուսի համար մղված մարտերում (1941-1944թթ.)» գիրքը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր