Գանադ Չարկազյանի ստեղծագործական երեկոն

29 հունվարի, 2020

2020թ․ հունվարի 29-ին Մինսկի Արտասահմանյան երկրների հետ բարեկամության և մշակութային կապի բելառուսական միության կողմից կազմակերպվել էր գրական երեկո՝ նվիրված հայաստանածնունդ գրող-բանաստեղծ Գանադ Չարկազյանի ստեղծագործական գործունեությանը։
Միջոցառմանը մասնակցություն ունեցան «Հայաստան» Մինսկյան քաղաքային մշակութա-լուսավորչական միության» ղեկավարությունը, Բելառուսի Գրողների միության անդամներ, ստեղծագործական մտավորականության, մշակույթի և ԶԼՄ-ներ ներկայացուցիչներ, ինչպես նաև Բելառուսի կրթական հաստատությունների սաներ։
Միջոցառման ընթացքում ելույթներով հանդես եկան Արտասահմանյան երկրների հետ բարեկամության և մշակութային կապի միության նախագահ Նինա Իվանովան, «Բելառուս-Հայաստան» միության նախագահ, պոետ, հրապարակախոս, լրագրող, «Բելառուս» ռադիոյի միջազգային հեռարձակման տնօրինության ղեկավար Նաում Գալպեռովիչն ու բելառուսական ստեղծագործ մտավորականության մի շարք ներկայացուցիչներ, որոնք ընդգծեցին Գանադ Չարկազյանի ստեղծագործությունների խոր և բազմաբնույթ լինելը։
Բելառուսում Հայաստանի դեսպան Արմեն Ղևոնդյանը իր ելույթում շնորհակալություն է հայտնել Գանադ Չարկազյանին, ում ստեղծագործությունը ներթափանցված է Հայաստանի և Բելառուսի, երկու երկրների ժողովուրդների մշակույթի, պատմության և ավանդույթների հանդեպ հավասարապես դրսևորվող ջերմությամբ։ Դեսպանի խոսքերով նմանօրինակ միջոցառումների անցկացումը նպաստում է նաև մշակութային բարեկամական կապերի հարստացմանը։
Միջոցառման շրջանակներում ստեղծագործ հանրության ներկայացուցիչներն ու մշակութային գործիչներն ընթերցել են Գ․Չարկազյանի ստեղծագործություններից հատվածներ՝ ուղեկցելով այն երաժշտական համարներով։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր