Հայաստանի Անկախության օրվան նվիրված միջոցառման վերաբերյալ

21 սեպտեմբերի, 2021

2021թ․ սեպտեմբերի 21-ին Մինսկում ԱՊՀ Գործադիր կոմիտեի կենտրոնակայանում կայացավ Հայաստանի Հանրապետության անկախության 30-ամյակին նվիրված ցուցահանդեսի բացումը։

ԱՊՀ Գործադիր կոմիտեի նախագահի-Գործադիր քարտուղարի տեղակալ Բեկետժան Ժումախանովը հանդես եկավ շնորհավորական խոսքով, որում առանձնանշեց հայ ժողովրդի հարուստ պատմությունը, Հայաստանի բնաշխարհը՝ մաղթելով բարօրություն և նորանոր ձեռբքերումներ։

Բելառուսի Հանրապետությունում Հայաստանի Հանրապետության արտակարգ և լիազոր դեսպան, ԱՊՀ կանոնադրական և այլ մարմիններում ՀՀ մշտական և լիազոր ներկայացուցիչ Ռազմիկ Խումարյանն, իր խոսքում անդրադառնալով անկախության սուրբ օրվա խորհրդին, ընդգծեց հայ ժողովրդի ամուր կամքը դիմագրավելու պատմական բոլոր արհավիրքներին՝ վստահություն հայտնելով, որ ապագայում ազգային տոները հայ ժողովուրդը նշելու է ավելի բարձր տրամադրությամբ և տոնախմբություններով։

Հանդիսավոր արարողությանը մասնակցեցին Բելառուսում Հայաստանի դեսպանության դիվանագետները, ԱՊՀ Գործադիր կոմիտեի ղեկավար կազմը և Գործադիր կոմիտեի աշխատակիցները։

Ցուցահանդեսին ներկայացված են Հայաստանի պատմությանը, մշակույթին նվիրված գրքեր, գեղարվեստական գրականություն, ամսագրեր և հայաստանյան տեսարժան վայրերը պատկերող ֆոտոալբոմներ։ Սրահում տեղադրված էկրանին ցուցադրվում են Հայաստանի վերաբերյալ հոլովակներ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր