Հայաստանի Հանրապետության 30-ամյակին նվիրված հավաք

22 սեպտեմբերի, 2021

Ս․թ․ սեպտեմբերի 22-ին Բելառուսի Հանրապետությունում Հայաստանի Հանրապետության դեսպանությունում կայացավ հավաք՝ նվիրված Հայաստանի Հանրապետության Անկախության 30-ամյակին՝ Բելառուսի հայ համայնքի ներկայացուցիչների և 44-օրյա պատերազմի ընթացքում իրենց առավել դրսևորած գործիչների մասնակցությամբ։

Միջոցառման մասնակիցները լռության մեկ րոպեով հարգեցին Արցախյան գոյամարտի, ինչպես նաև Արցախի դեմ 2020թ․ սեպտեմբերին սկսված ադրբեջանա-թուրքական ագրեսիայի հետևանքով զոհված հայորդիների սուրբ հիշատակը։

Իր ելույթի խոսքում դեսպան Ռազմիկ Խումարյանը նշեց, որ անկախության 30 տարիների ընթացքում հայ ժողովուրդը կարողացել է հաղթահարել բազմաթիվ դժվարություններ և փորձություններ։ Հայաստանը, դիմակայելով պատմության արհավիրքներին, վերապրել է բազմաթիվ կայսրությունների, որոնց մի մասի անունն անգամ շատերը չեն հիշում։

Հայաստանի դեսպանը շեշտեց, որ ինչպես անկախության 30 տարիների, այնպես էլ ընթացիկ տարվա հունիսին կայացած ընտրությունների ընթացքում Հայաստանի Հանրապետության քաղաքացիները վերահաստատել են իրենց հավատարմությունն անկախության և ժողովրդավարության գաղափարներին։ Չնայած երեսուն տարին բավական կարճ ժամանակահատված է ցանկացած պետականության համար, սակայն այս տարիների ընթացքում հասունացած անկախության սերունդը երկու անգամ ապացուցել է իր անկոտրում կամքը՝ պաշտպանել հայրենիքի ազատությունն ու անկախությունը սեփական արյան և կյանքի գնով։

Ռ․Խումարյանն ընդգծեց նաև Բելառուսի հայ համայնքի ցուցաբերած աջակցությունն ու օժանդակությունը Արցախի դեմ սանձազերծված ագրեսիայի օրերին։

ՀՀ դեսպանը նշեց Հայաստանի անկախության ամրապնդման, Արցախի մեր հայրենակիցների ազատ և անկախ ապրելու իրավունքն ապահովելու սրբազան գործում համախմբված աշխատելու կարևորությունը՝ դառնալով մեկ բռունցք, մեկ միասնություն՝ ի օժանդակություն հայոց պետականությանը։

Այնուհետև ԵԱՏՄ դատարանի նախագահ Էռնա Հայրիյանը ընթերցեց ԵԱՏՄ դատարանի շնորհավորական ուղերձը Հայաստանի Հանրապետության Անկախության օրվա կապակցությամբ։

Միջոցառմանը ներկա էին Բելառուսի հայ համայնքային կազմակերպությունների ղեկավարներ, ակտիվ գործիչներ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր