ՀՀ սփյուռքի գործերի գլխավոր հանձնակատար Զարեհ Սինանյանի և Բելառուսում կրոնների և ազգությունների հարցերով հանձնակատարի միջև կայացած հանդիպման վերաբերյալ

25 հունվարի, 2022

2022թ․ հունվարի 25-ին կայացավ ՀՀ սփյուռքի գործերի գլխավոր հանձնակատար Զարեհ Սինանյանի հանդիպումը Բելառուսում կրոնների և ազգությունների հարցերով հանձնակատար Ալեքսանդր Ռումակի հետ։

Հանդիպմանը ներկա էին Բելառուսում ՀՀ դեսպան Ռազմիկ Խումարյանը, «Մինսկի քաղաքային հայկական մշակութային-լուսավորչական «Հայաստան» միություն» հասարակական միավորման նախագահ, Կրոնների և ազգությունների հարցերով հանձնակատարին կից միջէթնիկական կոնսուլտատիվ խորհրդի նախագահ Գեորգի Եղիազարյանը, Բելառուսում ՀՀ դեսպանության երկրորդ քարտուղար Նարեկ Տիրատուրյանը, ինչպես նաև ՀՀ սփյուռքի գործերի գլխավոր հանձնակատարի գրասենյակի սփյուռքի ներուժի քարտեզագրման և ներգրավման վարչության պետ Կարեն Ավանեսյանը։

Զարեհ Սինանյանը բելառուս գործընկերոջը ներկայացրեց ՀՀ սփյուռքի գործերի գլխավոր հանձնակատարի գրասենյակի գործունեությունը, ընթացիկ ծրագրերը, որոնք նպատակաուղղված են ՀՀ և Սփյուռքի միջև փոխգործակցության ու կապերի հետագա ամրապնդմանը։

Իր հերթին, Կրոնների և ազգությունների գործերով հանձնակատար Ա․Ռումակն ընդգծեց բազում ականավոր հայերի նշանակալի դերը, ովքեր իրենց հետքն են թողել Բելառուսի պատմության մեջ։ Նրանց շարքում են Յան (Ավանես) Մաջարյանցը, Ալեքսանդր Մյասնիկյանը, մարշալ Հովհաննես Բաղրամյանը և այլոք։

Հանդիպման ընթացքում նշվեց, որ Բելառուսի հայ համայնքը հանդիսանում է ներկայումս Բելառուսի տարածքում բնակվող 156 ազգերի ու ազգությունների շարքում մեծությամբ թվով վեցերորդը, որի հիմնական մասը կենտրոնացած է Մինսկում, Մոգիլյովում, Բոբրույսկում և Գրոդնոյում։

Հանդիպման մասնակիցները քննարկեցին Բելառուսի հասարարական կյանքի տարբեր ոլորտներում հայկական համայնքի գործունեությունը՝ ներառյալ հայկական ստեղծագործական կոլեկտիվների մասնակցությունը տարաբնույթ մշակութային միջոցառումներին։

Ա․Ռումակը բարձր գնահատեց Կրոնների և ազգությունների հարցերով Հանձնակատարին կից միջէթնիկական կոնսուլտատիվ խորհրդի նախագահի պաշտոնում Գեորգի Եղիազարյանի բազմամյա կառուցողական գործունեությունը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր