Հայկական մշակույթի օրեր Մինսկի պետական լեզվաբանական համալսարանում

25 ապրիլի, 2022

2022թ․ ապրիլի 25-ին Մինսկի պետական լեզվաբանական համալսարանում (ՄՊԼՀ) մեկնարկեցին հայկական մշակույթի օրերը՝ «Unravel Armenia» ընդհանուր խորագրի ներքո։ Միջոցառումների շարքը կազմակերպվել է Մինսկի քաղաքային «Հայաստան» հայկական մշակութային-լուսավորչական միության երիտասարդական թևի նախաձեռնությամբ՝ Բելառուսի Հանրապետության կրթության նախարարության, Բելառուսում ՀՀ դեսպանության, «Անիվ» հայագիտական հետազոտությունների զարգացման և աջակցման հիմնադրամի համակողմանի օժանդակությամբ։

Բացման հանդիսավոր արարողությանը ողջույնի խոսքով ներկաներին դիմեցին ուսումնա-դաստիարակչական աշխատանքի գծով ԲՈՒՀ-ի պրոռեկտոր Սվետլանա Կովչուռը, Բելառուսում ՀՀ արտակարգ և լիազոր դեսպան Ռազմիկ Խումարյանը, ինչպես նաև Մինսկի քաղաքային «Հայաստան» հայկական մշակութային-լուսավորչական միության նախագահ Գեորգի Եղիազարյանը։

Կատարումներով հանդես եկան «Էրեբունի» հայկական ազգագրական պարային համույթի մասնակիցները և երգահան, գործիքավորող, ջութակահար Կարեն Կարապետյանը։

Հայկական մշակույթի օրերի ծրագիրը ներառում է թեմատիկ դասախոսություններ, այդ թվում՝ Բելառուսի ազգային տեխնիկական համալսարանի ճարտարապետական ֆակուլտետի դեկան, դոկտոր-պրոֆեսոր Արմեն Սարդարովի «Հայկական ճարտարապետության պատմությունը» վերտառությամբ դասախությունը, 1941-1944թթ. Բելառուսի ազատագրման համար մղված մարտերում հայազգի մարտիկների մասին դասախոսությունը, «Մեծ հաղթանակի զորահրամանատարները․ «Բագրատիոն» ռազմական գործողություն» խորագրով ցուցահանդեսը, ինչպես նաև շախմատային մրցաշար, հայկական խաչքարի կերտման լավագույն կոմպոզիցիայի ստեղծագործական մրցույթ և այլն։

Միջոցառումների շարքը կեզրափակվի ապրիլի 29-ին՝ գալա-համերգով։

Նախքան հանդիսավոր միջոցառումը կայացավ նաև դեսպան Խումարյանի հանդիպումը համալսարանի ռեկտոր Նատալյա Լապտեվայի հետ, որի ընթացքում քննարկվեցին հայաստանյան ԲՈՒՀ-երի հետ բելառուսական համալսարանի համագործակցության ծավալմանն առնչվող հարցեր։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր