Սպիտակի երկրաշարժի զոհերի հիշատակին նվիրված միջոցառում Մինսկում

07 դեկտեմբերի, 2022

2022թ․ դեկտեմբերի 7-ին Բելառուսում ՀՀ դեսպանության աշխատակիցները Բելառուսի հայ համայնքի ներկայացուցիչների հետ միասին հարգանքի տուրք մատուցեցին 1988թ․ Սպիտակի ավերիչ երկրաշարժի զոհերի հիշատակին։

Միջոցառման մասնակիցները ծաղիկներ խոնարհեցին Մինսկի Ալեքսանդր Նեվսկու եկեղեցուն կից տեղադրված Հայոց ցեղասպանության և Սպիտակի երկրաշարժի զոհերի հիշատակին նվիրված խաչքարին։

Բացման խոսքով հանդես եկավ Մինսկի «Հայաստան» հայկական մշակութային-լուսավորչական միության նախագահ Գեորգի Եղիազարյանը, որի առաջարկով ներկաները մեկ րոպե լռությամբ հարգեցին Սպիտակի երկրաշարժի զոհերի հիշատակը։

Բելառուսում Հայաստանի դեսպան Ռազմիկ Խումարյանն իր խոսքում նշեց, որ երկրաշարժի զոհերի հիշատակը հարգելուց և այդ դժվարին օրերին մեզ օգնության ձեռք մեկնած պետություններին ու ժողովուրդներին երախտագիտությամբ հիշելուց բացի, այսօր բոլորս պարտավոր ենք, ամենքս մեր տեղում, առավելագույնն անել Հայաստանի Հանրապետությանն ու հայ ժողովրդին հնարավոր նոր աղետներից զերծ պահելու համար։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր