Մարշալ Հովհաննես Բաղրամյանի 125-ամյակի առթիվ ֆիլմի ցուցադրություն Մինսկում

16 դեկտեմբերի, 2022

Խորհրդային Միության կրկնակի հերոս, մարշալ Հովհաննես Բաղրամյանի ծննդյան 125-ամյակի կապակցությամբ 2022թ. դեկտեմբերի 15-ին Մինսկի «Պիոներ» կինոթատրոնում կայացավ «Հաղթանակի արվեստ․ Մարշալ Բաղրամյան» ֆիլմի անդրանիկ ցուցադրությունը Բելառուսի տարածքում․ վավերագրական դրամայի պրեմիերան կայացել է լեգենդար մարշալի ծննդյան օրը՝ դեկտեմբերի 2-ին, Մոսկվայում։

Ֆիլմը պատմում է մի ամբողջ դարաշրջան խորհրդանշող մարշալի կյանքի, նրա անցած մարտական ուղու, ինչպես նաև Հայրենական մեծ պատերազմում նրա հրամանատարության ներքո իրականացված ռազմական գործողությունների մասին, որոնք մինչ օրս ուսումնասիրվում են աշխարհի մի շարք ռազմակրթական հաստատություններում։

Միջոցառմանը մասնակցեցին ԱՊՀ մասնակից պետությունների դեսպաններ և բարձրաստիճան դիվանագետներ, ԱՊՀ ԳԿ ղեկավար կազմն ու աշխատակիցներ, ԲՀ խորհրդարանականներ, գործադիր իշխանության բարձրաստիճան պաշտոնյաներ, զինվորականներ, հասարակական գործիչներ, գիտական-ակադեմիական շրջանակների, ԶԼՄ-ների, Բելառուսի շրջանների հայ համայնքների ներկայացուցիչներ։ Կինոյի ցուցադրությանը ներկա գտնվելու համար Մոսկվայից Մինսկ էին ժամանել մարշալի թոռները՝ Իվան Բաղրամյանը և Կարինե Նաջարովան։

Կինոթատրոնի նախասրահում Բելառուսի Հանրապետության Զինված ուժերի պատմության պետական թանգարանի և «Անիվ» հայագիտական հետազոտությունների զարգացման և աջակցման հիմնադրամի ջանքերով կազմակերպվել էր մարշալ Բաղրամյանին նվիրված ցուցահանդես, որի շրջանակներում ներկայացված էին արխիվային նյութեր, լուսանկարներ և փաստաթղթեր։

Մինչ ֆիլմի ցուցադրությունը ներկաներին խոսքով դիմեցին Իվան Բաղրամյանը և Բելառուսում ՀՀ դեսպան Ռազմիկ Խումարյանը։ Դեսպան Խումարյանը բարձր գնահատեց մարշալ Բաղրամյանի նկատմամբ բելառուս ժողովրդի վերաբերմունքը, որը պահպանում և սրբորեն հարգում է լեգենդար մարշալի հիշատակը, ում անունն անքակտելիորեն կապված է հիտլերյան զավթիչներից Բելառուսի ու Բալթյան երկրների ազատագրման հետ և ոսկե տառերով գրված է Հայրենական Մեծ պատերազմում եղբայրական ժողովուրդների հաղթանակի տարեգրության մեջ։

Միաժամանակ ընդգծվեց միջոցառման արդիականությունն ու կարևորությունը՝ հաշվի առնելով, որ ընթացիկ տարին Բելառուսում հռչակված է պատմական հիշողության տարի։

Անդրադառնալով մարշալ Բաղրամյանի հայրենի Չարդախլու գյուղին՝ Ռ․Խումարյանը ցավով արձանագրեց, որ Հ․Բաղրամյանի և առհասարակ հայկական ներկայության որևէ հետք ներկայիս Ադրբեջանի տարածքում գտնվող գյուղում այլևս հնարավոր չէ գտնել՝ այս համատեքստում՝ իբրև միջազգային հանրությանն ուղղված տագնապի կոչ մատնանշելով Լեռնային Ղարաբաղը Հայաստանի հետ կապող միջանցքի արգելափակման արդյունքում առաջացող հումանիտար ճգնաժամը։

Ստորև ներկայացվում է միջոցառման կապակցությամբ եթեր հեռարձակված տեսանյութը, որ պատրաստվել է բելառուսական հեռուստաընկերություններից մեկի՝ պետական «Беларусь 3» հեռուստաալիքի կողմից։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր