Գրքի մինսկյան XXX միջազգային ցուցահանդես-տոնավաճառին ՀՀ դեսպանության մասնակցության վերաբերյալ

23 մարտի, 2023

2023թ․ մարտի 23-ին կայացավ Գրքի մինսկյան հոբելյանական XXX միջազգային ցուցահանդես-տոնավաճառի միջազգային հատվածի հանդիսավոր բացումը։

Միջոցառմանը ներկա էին Բելառուսի տեղեկատվության նախարար Վլադիմիր Պերցովը, ԲՀ արտաքին գործերի նախարար Սերգեյ Ալեյնիկն ու Բելառուսի արտաքին քաղաքական գերատեսչության ղեկավարությունը, դիվանագիտական կորպուսի ներկայացուցիչները, ԱՊՀ գործադիր կոմիտեի պատվիրակությունը, ցուցահանդես-տոնավաճառի բազմաթիվ հյուրեր և այցելուներ։

Վ․Պերցովն ու Ս․Ալեյնիկը շրջեցին ցուցահանդես-տոնավաճառին մասնակցող 19 օտարերկրյա պետությունների դեսպանությունների տաղավարներով։ Գրքերի ազգային ցուցադրությունների շարքում էր նաև ՀՀ դեսպանության ռեսուրսներով ու ջանքերով համալրված Հայաստանի տաղավարը։ ԲՀ բարձրաստիճան պաշտոնյաները ծանոթացան Հայաստանի հարուստ պատմությունն ու մշակույթը ներկայացնող բազմաժանր գրականությանը, հայ-բելառուսական պատմական առնչություններին, այդ թվում՝ ընդհանուր պատմության հերոսական էջերին նվիրված հրատարակություններին։

Նախարարներ Պերցովին ու Ալեյնիկին ընծայվեցին, համապատասխանաբար, «Մեծ հաղթանակի զորահրամանատարները․ Բագրատիոն ռազմական գործողությունը» և «Հայ մարտիկները Բելառուսի համար մարտերում (1941-1944թթ.)» գրքերը, ինչպես նաև ընթացիկ տարում նշվող ՀՀ և ԲՀ միջև դիվանագիտական հարաբերությունների հաստատման 30-ամյակի կապակցությամբ ՀՀ դեսպանության տպագրած օրացույցը։

Գրքի մինսկյան հոբելյանական XXX միջազգային ցուցահանդես-տոնավաճառը կգործի մինչև մարտի 26-ը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր