Հայազգի նկարիչ Գրիգոր Դանիելյանի աշխատանքների՝ Մինսկում կազմակերպված անհատական ցուցահանդեսի վերաբերյալ

23 օգոստոսի, 2023

2023թ․ օգոստոսի 23-ին Բելառուսում ՀՀ դեսպան Ռազմիկ Խումարյանը դեսպանության դիվանագետներ Նարեկ Տիրատուրյանի և Արման Մելքումյանի ուղեկցությամբ այցելեց ԲՀ ժամանակակից արվեստի ազգային կենտրոն, որտեղ ցուցադրվում են հայազգի տաղանդավոր նկարիչ Գրիգոր Դանիելյանի (1950-2021թթ.) գեղանկարչական և գրաֆիկական աշխատանքները։ Ցուցադրությունը ՀՀ դեսպանության դիվանագետներին ներկայացրին Կենտրոնի տնօրեն Սերգեյ Կրիշտապովիչը և նկարչի դուստրը։

Ցուցադրությունն ընդգրկում է 1991-2020թթ․ Վարպետի վրձնի կտավները։

Թբիլիսիում ծնված Գ․Դանիելյանը, որի համար Բելառուսը դարձել է երկրորդ հայրենիք, դասվում է այն նկարիչների թվին, որոնք համարում են, որ գեղանկարչությունն, ամենից առաջ, մարդկային ոգեղեն վեհ էության արտացոլումն է։

Ցուցահանդեսը հնարավորություն է ընձեռում բելառուս արվեստասեր հանրությանը ծանոթանալ հայազգի նկարչի ստեղծագործական ուղու տարբեր փուլերում կերտված աշխատանքներին, որոնցում արտացոլվել են տարատեսակ ուղղություններ, այդ թվում՝ էքսպրեսիոնիզմ, կուբիզմ, կոլլաժային արվեստ և այլն։

Նկարչի աշխատանքներում ուրույն տեղ է զբաղեցնում փորձարարական գեղանկարչությունը, որը միաձուլում է երաժշտությունը և գույները։ Այս ստեղծագործություններից են կոմպոզիտորներ Կլոդ Դեբյուսիի «Պրելուդների» և Անտոնիո Վիվալդիի «Տարվա եղանակների» մեղեդիներից ոգեշնչված «Դեբյուսի» և «Վիվալդի» կտավների շարքը։

Ցուցահանդեսը կգործի մինչև ընթացիկ տարվա սեպտեմբերի 17-ը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր