Բրեստի մարզային գրադարանի գրքային ֆոնդը համալրվեց հայկական թեմատիկայով գրականությամբ

11 փետրվարի, 2024

Բելառուսի Հանրապետությունում և, մասնավորապես, Բրեստի մարզում Հայաստանի պատմամշակութային, գրական ժառանգության հանրահռչակման նպատակով 2024թ. փետրվարի 8-ին Բելառուսում ՀՀ դեսպանությունը Բրեստի Մ.Գորկու անվան մարզային գրադարանին անհատույց նվիրաբերեց ինչպես ՀՀ կրթության, գիտության, մշակույթի և սպորտի նախարարության, այնպես էլ դեսպանության կողմից հատկացված բազմաժանր գրքեր և տպագիր այլ նյութեր:

Դեսպանության կողմից անհատույց փոխանցված գրքերի ու տպագիր այլ նյութերի շարքում էին նաև Հայագիտական հետազոտությունների զարգացման և աջակցության «Անիվ» հիմնադրամի գիտական հրատարակությունները՝ ներառյալ «Մենք» շարքից լեգենդար մարշալ Հովհաննես Քրիստափորի Բաղրամյանի կյանքի ու մարտական ուղու մասին՝ վերջերս լույս ընծայված գիրքը, ինչպես նաև «Մաջարսկիներ. հայկական տոհմը Բելառուսի պատմությունում» գիտական աշխատությունը՝ նվիրված Բելառուսի գլխավոր խորհրդանիշներից մեկը հանդիսացող աշխարհահռչակ Սլուցկյան գոտիներին և վերջիններիս ստեղծողներին՝ հայազգի վարպետ-ջուլհակագործներ Յան և Լեոն Մաջարսկիներին (Հովհաննես և Լևոն Մաջարյանցներին):

Այս առիթով գրադարան այցելեցին ՀՀ դեսպանության երկրորդ քարտուղար Նարեկ Տիրատուրյանն ու Բրեստի մարզի հայերի «Նաիրի» մշակութային-լուսավորչական հասարակական միավորման նախագահ Սամվել Գիգոլյանը. վերջինս նվիրաբերեց հայոց լեզվի՝ երեք մասից բաղկացած ինքնուսույց ուսումնական ձեռնարկի 30 օրինակ (յուրաքանչյուր մասից 10-ական օրինակով):

Գրքերը տեղ կգտնեն օտարալեզու հրատարակությունների ընթերցասրահում:

Երկուստեք համոզմունք արտահայտվեց առ այն, որ առաջիկայում գրադարանը կվերածվի յուրատեսակ «ձգողականության կենտրոնի» ոչ միայն տեղի հայ համայնքի, այլև Բրեստի մարզի բնակիչների համար, ովքեր հնարավորություն կունենան բացահայտել Հայաստանը, ծանոթանալ հայկական արվեստին ու գրականությանը, ավելի շատ տեղեկանալ Հայաստանի և նրա ժողովրդի մասին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր