ՀՀ երկու թատերախումբ մասնակցեց Բելառուսում ընթացող միջազգային երիտասարդական թատերական փառատոնին

27 մարտի, 2024

Երևանի Հովհաննես Թումանյանի անվան Ազգային տիկնիկային թատրոնի և Կոնստանտին Ստանիսլավսկու անվան Երևանի ռուսական պետական դրամատիկական թատրոնի թատերախմբերը մասնակցեցին մարտի 21-ին և 27-ին նշվող, համապատասխանաբար, Տիկնիկային թատրոնի միջազգային օրվա և Թատրոնի միջազգային օրվա առթիվ ընթացիկ տարվա մարտի 20-27-ը Բելառուսի Հանրապետության Մոգիլյովի մարզում անցկացվող «Մ.արտ.կոնտակտ» միջազգային երիտասարդական 17-րդ ամենամյա թատերական փառատոնին:

Մարտի 25-ին Մոգիլյովի մարզային դրամատիկական թատրոնի աֆիշը հագեցած էր հայաստանյան թատերախմբերի խաղացանկից ներկայացումների վերնագրերով:

Թատրոնի փոքր բեմում Հ.Թումանյանի անվան Ազգային տիկնիկային թատրոնի թատերախումբը պատանի հանդիսատեսին ներկայացրեց հայտնի Հարրի Փոթերի մասին վիպաշարի մոտիվներով «Կախարդական հեքիաթներ» տիկնիկային ներկայացումը, իսկ երեկոյան՝ մեծահասակների համար նախատեսված «Բուկովսկի» փաստագրական-հոգեբանական դրաման (ռեժիսոր՝ Մարիետա Դովլաթբեկյան), որը պատմում է ամերիկյան սկանդալային գրականագետ, բանաստեղծ և լրագրող Չարլզ Բուկովսկու խրթին կյանքի և ստեղծագործական ուղու մասին: Թեև բեմադրությունը հայերեն էր՝ դրամայի հերոսներին մարմնավորող դերասանների փայլուն խաղի և հուզական արտահայտչականության շնորհիվ հանդիսատեսին լիովին ընկալելի դարձավ դրամայի բովանդակությունը: Ներկայացման ավարտին դերասաններն արժանացան հիացած հանդիսատեսի բուռն ու տևական ծափահարություններին:

Իսկ այնուհետև Մոգիլյովի մարզային դրամատիկական թատրոնի մեծ բեմում Կ.Ստանիսլավսկու անվան Երևանի ռուսական պետական դրամատիկական թատրոնը ցուցադրեց վերջինիս գեղարվեստական ղեկավար Կարեն Ներսիսյանի ռեժիսուրայով բեմադրված ամերիկացի ժամանակակից դրամատուրգ Դոն Նիգրոյի «Մարդիկ: Գազաններ։ Հանգամանքներ» տրագիկոմեդիան. 11 կարճ դրվագից բաղկացած պիեսը խորհրդածություն է տարատեսակ հանգամանքներում մարդկային վարքագիծը կառավարող բնազդների դրական և բացասական դրսևորումների, կյանքի իմաստի ու այսօրվա մասին: Ներկայացումը շռնդալից հաջողությամբ անցավ լեփ-լեցուն դահլիճում:

Ներկայացմանը (տիկնանց ուղեկցությամբ) ներկա գտնվեցին Բելառուսում ՀՀ դեսպան Ռազմիկ Խումարյանը, Մոգիլյովի մարզի փոխնահանգապետ Վալերի Մալաշկոն և Մոգիլյովի քաղաքապետ Ալեքսանդր Ստուդնևը, ինչպես նաև Մոգիլյովի մարզային «Մասիս» հայկական բարեգործական հասարակական միավորման նախագահ Կարեն Փամբուխչյանը:

Փառատոնի շրջանակներում հայաստանյան վերոնշյալ թատերախմբերը մարտի 24-ին ներկայացումներ են ունեցել նաև Բոբրույսկում:

Փառատոնի արդյունքներով Հ.Թումանյանի անվան Ազգային տիկնիկային թատրոնի «Բուկովսկի» տիկնիկային ներկայացումը երիտասարդական ժյուրիի գնահատմամբ ճանաչվել է «Ֆորումի լավագույն ներկայացում»՝ արժանանալով դա հավաստող դիպլոմի: Միաժամանակ ժյուրիի կողմից «Դերասանական համույթ» հատուկ դիպլոմով պարգևատրվել է Կ.Ստանիսլավսկու անվան Երևանի ռուսական պետական դրամատիկական թատրոնի «Մարդիկ: Գազաններ։ Հանգամանքներ» ներկայացումը։

«Բելառուս-4 Մոգիլյով» պետական մարզային հեռուստաալիքի ռեպորտաժը «Մ.արտ.կոնտակտ» փառատոնին հայաստանյան երկու թատրոնների մասնակցության վերաբերյալ հասանելի է հետևյալ առցանց հղմամբ.

https://www.youtube.com/watch?v=zXeSFLOe9h0:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր