Բելառուսական Բոբրույսկ քաղաքի հայ համայնքը նշեց իր կազմավորման 25-ամյակը

23 հոկտեմբերի, 2024

Բելառուսի Բոբրույսկ քաղաքում գտնվող Դրամայի և կոմեդիայի Մոգիլյովի մարզային թատրոնում 2024թ․ հոկտեմբերի 20-ին կայացավ Բոբրույսկի հայ համայնքի կազմավորման 25-ամյակին նվիրված՝ «Հայաստանի հոգին Բոբրույսկում. բարեկամության 25 տարի» խորագրով տոնական համերգ։

Հանդիսատեսին անմոռանալի պահեր պարգևեց հայկական ազգագրական պարերի «Էրեբունի» համույթը, որի մասնակիցներից մի քանիսը նաև ասմունքեցին Հայաստանին ու Բելառուսին նվիրված բանաստեղծություններ, ինչպես նաև հանդես եկան երաժշտական համարներով։ Համերգի շրջանակներում շնորհալի երիտասարդ հայ երաժիշտների կատարմամբ հնչեցին Կոմիտասի, Առնո Բաբաջանյանի, Արա Գևորգյանի և այլոց ստեղծագործություններ։ Հանդիսատեսը հնարավորություն ունեցավ վայելել ջութակի, ինչպես նաև հայկական ազգային երաժշտական գործիքների, մասնավորապես, դուդուկի և քանոնի անզուգական հնչյունները։ Ելույթ ունեցան նաև հրավիրված բելառուս երգիչներ, որոնց մի մասը հայազգի գործընկերների հետ կատարեցին զուգերգեր։

Միջոցառման հրավիրյալ հյուրերի շարքում էին Բելառուսում ՀՀ դեսպանության դիվանագետները, Մինսկի, Բրեստի և Գրոդնոյի հայ համայնքների, ինչպես նաև Բոբրույսկի քաղաքային իշխանությունների ներկայացուցիչներ։ Բոբրույսկի հայ համայնքի հոբելյանի առթիվ շնորհավորական խոսքով հանդես եկան և հետագա արգասաբեր գործունեություն ու բարգավաճում մաղթեցին Բելառուսում ՀՀ դեսպանության գործերի ժամանակավոր հավատարմատար Նարեկ Տիրատուրյանն ու Բոբրույսկի քաղաքային գործադիր կոմիտեի գաղափարախոսական աշխատանքի և երիտասարդության գործերով բաժնի պետ Վերոնիկա Վիլչիկը։

Ավելի վաղ նույն օրը Բոբրույսկի, Մինսկի, Բրեստի և Գրոդնոյի հայ համայնքների ներակայցուցիչներն ու ՀՀ դեսպանության դիվանագետները ներկա գտնվեցին Բելառուսական Ուղղափառ Եկեղեցու հոգևորականի ձեռամբ հայկական խաչքարի օծման և հանդիսավոր բացման արարողությանը, ինչպես նաև Բոբրույսկի հայ համայնքի նախորդ ղեկավար Արշակ Թանդիլյանի ծննդյան տարեդարձի կապակցությամբ հարգանքի տուրք մատուցեցին վերջինիս հիշատակին՝ ծաղիկներ խոնարհելով նրա շիրմին։

Ներկայացված են «Бабруйскае жыццё» թերթի ֆոտոլրագրողի պատրաստած լուսանկարները` https://www.bobrlife.by/news/dusha-armenii-v-bobrujske-proshel-prazdnichnyj-konczert-posvyashhennyj-25-letiyu-armyanskoj-obshhiny-masis/:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր